1911: O americano Talecón


Como salíus de una película, o americano Talecón y os dos amigos que con él venioron allá en primeras o siglo XX salen a relucí cada vegada que se charra de fotos ansotanas viellas:




Se veye firme claro que o americano fició vení a un fotero de Barcelona, de a casa Manuel Balmes, pa retratase con a familia y os amigos, y que luego repartió as fotos con toz. Un güen detalle que cien años pasáus dimpués lin agradecemos.

Aquí tenemos os cuatro hirmanos. Dreitos, Albeita (Miguel), Forastero (Martín) y o americano (Joaquín). Posáu, Tío Primo Talecón:



Aquí o americano con a mullé, a italiana Rosa, bien pinchos:


Nos fa sabé Tía Paquita Mendiareta que a o americano y a mullé lis ficioron en Ansó hasta una jota, que veniba a decí algo así:

A os catorce años de edá,
se'n fue Joaquín ta Argentina,
y a os treintayocho tornó,
con a Rosa más polida. 


Tío Albeita con as fillas, unas chovenetas Josefa y Ana Rosa:



Y Tío Primo Talecón con a mullé, Agustina Alberro:



Y como guinda as dos fotos de grupo que me ha pasáu Miguel. Una con a familia:



L'otra con amigos y pariéns:



Ha costáu, pero hemos podíu í sacándolos, o ixo nos parixe:

Dreitos, prencipiando por a zurda, Tío Forastero, Tío Ornata, o crabero Seta, Pascual de Techinero, uno de os americanos y, ta dreita, Tío Cherón y Tío Ostias.

Posáus, Tío Primo Talecón, l'otro americano, o zagal Antonio Techinero, o americano, Tío Albeita y Joaquín de Mendiareta. Antonio yera o mayó de os tres hermanos de Casa Techinero, con Manuela y Primo. Morió a os dieciocho años de unas fiebres muito malas que ficioron muita mortandá.


Bistaba otro hirmano de os Talecóns, clamáu Sebastián, que se casó con una moza de Casa Licáu (en fren de Casa Caballé), y que morió choven: se cayó en un foráu en un mal paso que bistá en Puerto, y allí estió toda una noche que no paró de plevé. Lo rescatoron a l'otro'l día vivo, pero agarró una pulmonía y marchó ta l'otro barrio. Manuela de Loarre desciende de él, y puede sé que tamién os amos de o pallá de Foria.


Y a que completaba a familia yera a hirmana, Francisca Aznárez, pero no sale en as fotos porque tamién morió choven:


Mullé de Pascual de Techinero, mai de Antonio, Manuela y Primo. Una ansotana de pura raza, mi bisagüela.

Gracias a Tía Paquita Mendiareta, mi pai y mi mai, hemos podíu completá una miqueta más a historia de uno de os ansotanos más famosos...


No hay comentarios:

Publicar un comentario