En un lugá de l'Alto Aragón, que no ye otro que Ansó, Orosia Garcés de Abarca y Eloy Sancho de Embún, os dos heréus más acaudalaús de a villa, llevan intinción de casase, y por ixo as dos familias se veyen en tratos. Pero Venancio (José Sepúlveda), uno de os mozos más barrabases, acaba de torná de Francia y malmete a Joselón de Urríes (Pepe Nieto), o furo amigo suyo que ya heba pretendíu a Orosia de más choven, pa desfé os plans de casorio fendo una ronda, rempuxándolo a fé güena estruesa...
Florian Rey se heba inspiráu en a novela "A zaguera ronda" de Manuel Bolaños. Iberia Films yera qui correba con os gastos, y en a cinta tamién treballan Nicolás Díaz Perchicot fendo de Don Pablo, María Bru fendo de Isabel, Delfín Pérez fendo de Gracián, Ángel Belloc fendo de Eloy y un Pepe Isbert que fa de Don Cándido, un chocante alparcero. Dura 71 menutos.
Un par de escenas son de destacá: a de a misa os pastós, en do se veye o que se esforzan pa podé acudí o domingo a escuitala, y o final en o cementerio, con a Patética de Tchaicovsky de fondo.
Orosia yera uno de os treballos grans dirigíus por o aragonés que se daba por perdíu, pero que 50 años dimpués logró rescatase gracias a que Ángel, que heba participáu en o rodaje fendo o papel de Eloy, heba guardáu en una arpillera una copia que heba recibíu como pago por treballá en ella. Sólo la heban sacáu pa viyela un par de vegadas. A empresa Parra facilitó o reestreno de a película o 23 de abril de 1992 en o cine Fleta de Zaragoza.
Podió viyese en o cine de Ansó en 2002, o zaguero día o PIR. Qui quiera viyela de nuevas, aquí la tiene:
Por metá bistá un cacho en o que o soníu va una miqueta rezagáu, pero ixo no fa perdé o filo.
Fuens: decine21
No hay comentarios:
Publicar un comentario