Plazuela Manato

Bistá un dito de a Plazuela en cuenta una subasta...

Os de Manato, barato;

os de Juaquineta, a peseta;

os de Menudo, a duro;

os de Trinqué, por qué.

Plegoron os de Soro, y se llevoron todo.

Mi tataragüelo Antonio Añaños yera de Casa Manato. Mi güela María Animetas li contó fa muito a mi mai a historia de a truca que ficioron un mozo y una moza hirmanos de Casa Techinero al casase con una moza y un mozo hirmanos de Casa Manato. Ixe mozo de Manato yera Antonio...

As dos parejas se heban casáu feba un tiempo, y heban marcháu as mullés a viví ta casa os hombres, como yera costumbre. Pero no se entendeban bien con as suegras, y pa apañase decidioron cambease as casas, tornándose ellas ta casa os pais, y llevándose con ellas a os maríus...

De ixa traza, un Galete (que así clamaban a os güenos mozos de Techinero, apellidáus Galé), marchó a viví ta casa a mullé, Casa Manato, mientras que Antonio Añaños (que yera antonces o apellíu propio de Casa Manato) se'n venió ta casa a mullé suya, Casa Techinero...

D'acá ta deván, os apellíus de os fillos cambeoron de casa: os Añaños naxoron en Casa Techinero, y os Galés en Casa Manato. O fillo de Antonio, mi bisagüelo Pascual de Techinero, de calzón, yera Añaños Galé, y yera primo hirmano por partida doble de Elías de Manato, que llevaba Galé Añaños, que tamién yiba de calzón y yera alto y recio...

Mi güelo de Techinero, Primo Añaños, güen mozo tamién, yera primo segundo de Tío Manato, Mariano Galé; os dos de cazón. Mi mai Paquita y José Manato yeran primos terceros. 

Al no habé teníu Primo más que fillas, o apellíu Añaños se perderá en Casa Techinero, mientras que o Galé aguanta en a de Manato.

A fuen tamién ha yíu cambeando con os años, sin dejá de salí en muitas fotos y cuadros... 

Casa Menudo, Trinqué, Manato, Juaquineta, Marconé, Aniceto, Bastero, Baretoné, Albeita, Soro, Paula, Mendiareta... Con a fuen, a Plazuela sigue siendo uno os rincóns más políus de Ansó...