Bienveníu

Bienveníu ta un paseo en o tiempo por a cultura y o paisaje de Ansó.

Contáu en a fabla que le ye propia, l'ansotano.

A lengua ye parte de o que se conta.

Charrá de Ansó en ansotano ye un homenaje ta memoria de a chen que lo ha vivíu y nus lo ha feito plegá.

O blog trata de a historia ansotana, de os mons, a fabla, o traje y os costumbres.

Replega tamién os cuadros, as fotos viellas, o cine y os libros que han miráu u contáu Ansó a lo largo de o tiempo.

O conteníu puede recorrese siguiendo o índice temático.

¡Bienveníu!

2025: Magia en a Torreta

Algo bistá en a Torreta

que fa dispertá as miradas,

tornando en baile de luces

as imagens más calmadas.

2025: A Mesa con chelo y ñeu

Estampa invernal de a Mesa os Tres Reys, en do a ñeu parixe abrazá a estatua de San Francisco Javier, y a vista se pierde entre os infinitos picos cheláus...

Calma en o cobalto.

Zarran o camín un manto de ñeu y l'ausín cortante.

Paso a paso, cruxe a ñeu en a puyada.

A Mesa os Tres Reys se alza distante.

O Pirineo duerme, o corazón late. Os mons guardan silencio.

Plega l'alba y o sol tímido se asoma, pintando de oro a redolada.

O gigante de peña encoge l'alma.

¿Cuál será o secreto que oculta con tanto celo...?

¡Ye a paz de a Mesa, con su blanca mirada!

Imagens cedidas por Fernando y Jesús: Pirineos Wilderness

2025: Acuarela de ñeu

Ansó sabe de inviernos largos, de ñeu que caye y torna a cayé, de fumo que puya y asoma por as chamineras, de mocés tirándose pilocos en o recreo a escuela, de chelo en as carreras, de charpaleta...