Ansotano: fósils

Fósils en o Puen de a Val de Asieso

En os tiempos de o Eoceno, fa 50 millóns de años, Ansó y todo o que hoy ye o Pirineo estaban sumergíus bajo o mar de Tetis. Allí viviban os nummulites, as conchas de os cuáls aparixen como fósils en as peñas de ixa época, como as de o cerro Peña Santa Cruz o as de as maryins de o Barranco Arrigo.

Tamíen en istá en o puen de a Val de Asieso, debajo Santa Lucia y antis de plegá ta Foz de Biniés, camino que se pilla en a Borda Blasquico...

Ixa zona tiene muito encanto, con o puen, que algunos claman romano sin sélo, y con as pozas que fa Veral, que parixen treballos de alfarería.

Bistá rastro de o que parixe que fue una presa.

Fuens: bva, casabareton, wikiloc, biniespueblo

Fósils en Esper (Aspe)

Restos de moluscos marinos Rastellum carinatum, una ostra fósil que vivió fa unos 120 millóns de años:

A 2.500 metros de alto, en a puyada ta Esper dende o parking de a Cleta, pasáu o plano Napazal, bistá fuellas de o que en o Cretácico inferió yera un mar de agua callén y poco fonda, hoy desaparecíu: o mar de Tetis. Allí fueron amontonándose muitas conchas que os sedimentos cubrioron con o tiempo. Al plegase y devantase a tierra y formase os Pirineos, dioron lugá a ixos lejanos mons ansotanos que nusotros clamamos Esper...

En metá de as majestuosas crestas, o pasáu alenta a monico. Cada fósil que aflora en o camín, clamando l'atención, ye una ventana ta aquellos tiempos de antis más. Un latíu deteníu, un recordatorio de que todo cambea y, con ixo, siempre bistá algo que permanece.

Son maravillas naturáls en do geología y biología se dan a mano. Os mons no guardan sólo as alturas, custodian tamién memorias más viellas que a memoria mesma.

Ruta en wikiloc

Fósils en o Pozo Mancho

As peñas que conforman o estreito en do se remansan as aguas de Veral en o Pozo Mancho ocultan un secreto...

Están feitas de conchas fósils de nummulites, unos bichos marinos que vivioron en a época de o Eoceno, fa 50 millóns de años, cuando as tierras ansotanas estaban cubiertas por o mar de Tetis. Sólo ye menisté entrá en a poza por a zurda y meté una miqueta de atención, porque están muito pretas y no se han desfeito como ye por caso as de a Peña Santa Cruz...

Sí, parixe un milagro, pero o fondo de aquel mar puede pisase hoy en o canto Veral. As conchas de cal se depositoron y formoron as peñas que dimpués de muitos tiempos han síu devantadas hasta do se troban hoy. Según acerca uno a mirada las va columbrando con más detalle...