Una añada más, as fiestas plegoron y se acaboron. Ya tornarán. Güenas orquestas, vacas templadas, disfrázs chulos, güen tiempo y gran charanga. ¡Na más con istos mocés de Jaca ya bistaba pro fiesta!
Astí alguna foteta:
Y pa qui no podió está en as vaquillas, o quiera viyelas con más calma, astí he resumíu os dos días:
A música de fondo ye de o concierto vermú de a Orquesta Magnum.
O programa de iste año viene en una sola fuella, con a foto de tío Botero y una choveneta Blanca posáus en un banco.
Como l'año pasáu ya ficiéy o recorríu completo de o programa y no querébay repetime, he preferíu fé un día de o traje "alternativo", fuyendo de os chentíos, os discursos y os sermóns. Como feba caló, bistaba muita chen, y estábay algo canso, ixo me veniba mejó...
He pasáu de largo o rincón de Prisca y a plaza, y he prencipiáu o día en o rincón de a ilesia. Allí bistaba menos chen, y os "gorgocheros" atendeban a os foranos y a os de a tele.
Lo fan por amó a l'arte y de güena gana, y ixo se nota. Hoy Elena ha teníu un reconocimiento muito merexíu por su treballo.
A ilesia estaba queda, y he podíu fé fotos pa empleá en otro momento.
Algunos pillaban sitio de temprano...
Sin autos, os rincóns de Ansó ganan muito...
Luego me'n he tornáu enta o Rincón de Prisca. O chentío heba menguáu, pues toz se'n heban yíu enta plaza:
Quedaban, eso sí, os remenches de o treballo, aquí tamién por amó a l'arte:
Plegaba a hora de desfilá cata ilesia y querébay pillá sitio va viyé si podébay fé un video mejó que l'año pasáu, que me salió curtáu por metá. ¡Imos pues...!
Se veye claro que o desfile ye uno de os mejós momentos pa lucí y apreciá o coloríu de os trajes.
De a misa, he trobáu en a rete a Salve, por Regina Trigo y a Rondalla Ansotana:
Entremientras, en a carrera heba quedáu un retén de chovenalla...
Que ha servíu pa mantenenos algo entreteníus o rato largo que han tardáu en torná salí os de a ilesia:
O alacáy no he podíu viyelo, y o festival de de tardes ha estáu muito bien.
As fotos son mías, pero bistá otras muitas y güenas astí: jacetaniaexpress.
Y no puedo resistime a calá istas dos de Michel Renard:
Antonio Jesús Gorría Ipas, Antonio Tomás, renova su gran treballo sobre o traje:
Si algo clama l'atención en iste nuevo treballo de Antonio ye, sin de duda, a coló, algo que se trobaba faltá en istos tiempos en o primé libro, (⏯) que sacó fa cuasi una vintena años:
Ixa coló de o traje ansotano ye un goyo pa os güellos. Así lo esplicó Antonio en Huesca TV, en do tamién fue presentáu o gran video promocional de Turismo Ansó:
O conteníu, que ya yera fondo y guallardo en o primé libro, tamién se ha veito cubríu con nuevas aportacións, o que fa ista obra tornase en o referén definitíu pa iste tema tan queríu pa os ansotanos y pa toz os seguidós de as tradicións de antis más.
Antonio ha tornáu a lográ fé o gran libro o traje ansotano.
