2011: Güela ansotana en a Revista Críticos de Arte

A revista Nº 16 de a Asociación Aragonesa de Críticos de Arte traye un gran treballo: A güela ansotana en l'arte de finals de o siglo XIX y prencipios de o XX. Un referén en a cultura europea.

Charra de pintura, fotografía y literatura. Pa viyelo, puncha astí⏯

1935: Cuadros y cartéls de Francisco de Cidón

Francisco de Cidón Navarro (1871-1943) fue un pintó valenciano afincáu en Zaragoza en 1924. Influíu por Sorolla, Cidón viajó ta Ansó en 1935, en do fició un políu treballo de cuadros, dibujos y acuarelas:

Cidón se sintió muito atrayíu por as chamineras que adornan os telláus ansotanos...

Y, como en o caso de Sorolla, por o traje:

  

En a obra de Cidón ye patente o bien que sabió captá a esencia ansotana.

Fuens: Revista Aragón turístico y monumental 388, Revista Aragón.

1934: Cuadro de C. Martínez Kleiser

Tituláu igual que o que resultó ganadó, Ansotanos, iste cuadro fue presentáu por Carmen Martínez Kleiser ta o concurso pintura l'año 1934:

Fuens: Fernando Alcolea, studylib

1934: Ansotanos, de Aguiar, premio pintura

O canario José Aguiar gana o primé premio en o Concurso Nacional de Pintura de l'año 1934 con o cuadro "Ansotanos":

Así lo contaban en ABC: "o documento de a barroca y colorista indumentaria de Ansó ye auténtico...":

José Aguiar

Fuen: ABC, BNE.

1929: Tío Techinero, cuadro de Rincón

O pintó Vicente Rincón Garrido (Fuentes de Ebro, 1892 - Barcelona, 1958), tenió Ansó como tema pa unos cuantos cuadros. En uno de 1929 pintó a Pascual Añaños, tío Techinero, mi bisagüelo:

Tamién lin fició uno a o Rincón de Orná:

Y otro a una mullé fendo filo:

Fuen: pintores, bva.

1928: O paisajista Octavio Bianqui

O pintó murciano Octavio Bianqui (1872-1936) recorreba cada año os rincóns de España, y dimpués exponeba en Madrí os cuadros que heba yíu fendo. En ellos contaba os paisajes que heba veito, sin alaracas ni pretensións, pero sí con espíritu y luz:

O caserío ansotano lo contivó:

Otro artista más de os que estió por Ansó y querrió llevase una miqueta pa recuerdo.


Fuens: Revista Esfera, hemeroteca de ABC.

1926: Os cofrades de Ansó, cuadro de Jacinto Alcántara

Aparixe en a revista Esfera:

Y se veye firme claro que están posáus en a sacristía a ilesia San Pedro. Dezaga de ellos está a cambra en do se guardan as casullas y a lacena en do se guarda o vino celebrá, como sabemos firme bien os que hemos síu monaguillos...

Fuen: a esfera

1924: Polida ansotana, cuadro de JJ Gárate

Moza ansotana de pañuelo...

Otro gran cuadro de o pintó de Albalate l'Arzobispo.

1923: Boda en Ansó, cuadro de JJ Gárate

Acuarela de o pintó turolense Juan José Gárate donáu ta o Ayuntamiento Zaragoza:

Como a tantos otros pintós y fotógrafos, a Gárate le atrayeban o caserío y os trajes ansotanos, y venió a pintá enta Ansó os veranos de 1923 y 24.



Fuens: Ayuntamiento de Zaragoza, Cuadernos de patrimonio

1923: Dibujos y apuntes de Ramón Acín

Os artistas de fináls de o siglo XIX y primeros de o XX se sintioron fascináus por o traje ansotano y Ansó. Pa muestra, os dibujos y apuntes que o artista oscense Ramón Acín fició en os años 20:

Fuen: fundacionacin, museodehuesca

1921: Una ansotana, cuadro de Vázquez

Otro cuadro más de o pintó manchego: Una moza con traje de fiesta que fue portada de a revista Blanco y Negro:

Ye menisté fé notá que no lleva pañuelo pero tampoco lleva os churros ta l'aire.


Fuen: hemeroteca ABC

1920: Cuadros de Manuel Villegas

O pintó leridano Manuel Villegas (1871-1923) fició dos cuadros inspiráus en os trajes ansotanos:

Mulles de a Val de Ansó:

y Domingo Ramos en a Val de Ansó:

Fuens:

maestrosdelretrato
commons.wikimedia

1917: Grabáus de José Loygorri

Pintó vallisoletano naxíu en 1884 que, dinantes de triunfá en o mundo l'Art Decó, tenió una época naturalista en a que fició istos grabáus de ansotanas de basquiña:

"De a Val de Ansó":

"L'ansotana":

Fuen: artevalladolid

1916: En a ermita, cuadro de García Condoy

Naxíu en Zaragoza en 1889, o pintó Julio García Condoy participó en 1917 en a Exposición Nacional de Bellas Artes, en do ganó a 3ª medalla con o lienzo tituláu "En a ermita", inspiráu en Ansó. 

Ye una pena que no se  sepa en dó para o cuadro, y que solo se conserve ista foto en blanco y negro, que no le fa justicia.

Fuen: academia.edu

1912: Sorolla pinta Ansó

En ista foto de 1911, se veye a o gran pintó valenciano Joaquín Sorolla treballando afanáu en un cuadro que clamaría: "Güela y Ñeta de Ansó":

Parixe que pa felo tomó modelo de ista foto feita deván de a puerta o Convento As Descalzas Reals, en Madrí:

As fegurantes yeran as ansotanas Sebastiana Puyó y su ñeta Sebastiana Brun, de Casa Tomasé:

O retrato se heba feito estando un rabaño ansotanas en Madrid, ta do iban a vendé té, y o pintó fició en 1912 o cuadro "Güela y Ñeta de Ansó" en o que hoy ye o Museo Sorolla. Impresiona viyelo:

En zagueras de 1912, Sorolla venió enta Ansó, Roncal y Roncesvalles. 

"Tipos de a Val de Ansó" fue pintáu en o verano 1914, en un segundo está de Sorolla en Ansó. Iste cuadro retrata dos mullés ansotanas muito pinchas, con as Eslinaderas o Paco Ezpelá dezaga de fondo. A más choven ye Sebastiana Brun, con vestíu de novia y portando en a mano una rameta membrillo, y ye a mesma moceta que retrató Sorolla en "Güela y Ñeta de Ansó". Chunto ta ella está Pascuala Mendiara, de Casa Cherón, que tantas vegadas fará dimpués de modelo pa artistas de tos os colós. Ye un cuadro muito políu:

En o está de verano de 1914, tornó Sorolla a eslegí Ansó na menos que pa fé uno de os grans murals pa decorá a Biblioteca de a Hispanic Society de Nueva York, "Aragón, a Jota", y que algunos podioron disfrutá en O Prau. O pintó valenciano estió dándole güeltas a como plasmá o espíritu de o dance en un cuadro que teneba que representá a tierra aragonesa. En primeras tenió en mente ísto:

Fue fendo probatinas como ísta:

Iba calando en as prebas ansotanos u ansotanas sueltos chunto con baturros, pero ixo no terminaba de convencelo, y preferió meté na más que una rabera ansotanos danzando con muito garbo, mientras en a parte de deván un mesache festeja una moza. Dezaga se veyen os mons ansotanos, con os que a chen parixe fundise. O resultáu no precisa palabras:

O Museo Sorolla tamién replega un faxo debujos de os que fue fendo como probatinas pa íste y os otros cuadros:

Tamién en o Museo pueden viyese trajes y otras muitas jarcias que o pintó cumpró u lin dioron o verano l'año 14. De o apego que le pilló a Ansó da preba ista foto de as dos fillas suyas, Elena de fallera y María de basquiña:

U esta otra de María con as amigas:

Fuen: Museo Sorolla.